【明報專訊】彩虹邨即將重建，房屋局長何永賢噚日喺社交平台發帖話重建研究工作推展緊，為畀街坊更了解相關內容、吸納街坊心聲，房屋署同事特意翻新邨內金碧樓空置嘅「芝蘭髮廊」成為「彩虹生活館」，噚日開幕。生活館逢周二、四、六、日有導賞員向大家介紹，現場佈置用咗邨內嘅特色物品，亦提供地方畀街坊填問卷表達建議。 何永賢話館內有「重建三部曲」展示，向大家解釋彩虹邨分3期重建嘅構思；同時介紹第一期重建嘅居民可搬去新嘅美東邨，仲有宏照道綠置居項目；另有空間介紹牛頭角上邨、蘇屋邨重建例子，配以模型同影片等，更立體展示重建概念。 何永賢噚日朝早同立法會議員顏汶羽、黃大仙區議員越毅強等人一齊到場，喺館內茶檔道具攤位向街坊派奶茶同蛋撻等，齊齊飲啖茶食個撻，探索未來點樣保留邨內特色同鄰里情。
