對老一輩來說，工作要由低做起，不應太短視計較薪水低，而是要勤懇地在一間公司慢慢發展，一直默默打拼總會有出頭天；而年輕人則更重視工作帶來的滿足感，因此並不贊成盲目加班，而是看重工作與生活平衡和靈活性。
「後生仔唔好成日諗住轉工，唔好『騎牛搵馬』，勤勤力力咁做一份工，唔好介意一開始人工低。我哋嗰陣時，努力啲工作就一定可以升職、加薪！」
「與其話『騎牛搵馬』，更應該話我哋年輕人轉工係為咗搵更合適嘅機會。世界好多工作選擇，總會有有趣、具創意、快樂，或者工作環境、模式彈性、友善嘅工作，有時就算人工低啲，試下新嘢，拎啲經驗都無妨。好似近期好多年輕人會去Working Holiday(工作假期)，就係邊去外國體驗其他文化，邊賺啲錢。」
「翻工係為錢，有時辛苦、唔開心都要照做。我哋嗰陣時喺公司做嘢，好有歸屬感，重視團體整體利益，有咩趕急工作，一大班人漏夜趕貨。年輕人，『飲水要思源』，唔好因為眼前利益而隨便轉工。」
「年輕人工作唔完全只為咗人工同公司利益，我哋同樣重視從工作中得到滿足感、成就感，甚至對社會嘅價值。尤其係有啲工作需要時常加班，令我哋冇晒Work-Life Balance(工作同個人生活取得平衡)。」
「嗰陣時生活艱難，有時要翻幾份工，真係冇話分清工作同生活……係呢，後生仔成日講『裸辭』，其實咩係『裸辭』？」
「『裸辭』指未搵到另一份工作就辭職。有時工作壓力太大，為咗自己情緒健康著數，未搵到另一份工都辭職，咪當放個假期。」
「『裸辭』太過衝動啦，分分鐘幾個月都搵唔到工，『手停口停』，咁咪咩錢都冇！ 」
「其實好多年輕人翻正職之外，都會配合興趣，閒時做啲副業，亦即係所謂『斜槓一族』(Slasher)，例如喺社交媒體畫圖、寫文章、教樂器等，當係賺啲外快，做得好仲有機會變做全職！配合社交媒體，我哋嘅技能可以喺更廣闊嘅平台展現，而唔只係好似以前咁只能喺實體店鋪售賣。」
「翻工就係賺『辛苦錢』！悠悠閒閒留喺屋企自然就未必賺到咁多……所以最緊要勤力！」
「都未必！而家好多年輕人都有學下投資，其實投資都需要好多準備，而且有一定風險，所以留喺屋企做投資，都唔係『舒舒服服』咁賺錢。」
「總之嗰陣時咁辛苦工作，終於換到而家有車、有樓，所以年輕人都要努力啊，努力一定會『成功』！」
「而家年輕一代『成功』嘅標準同上一輩唔完全一樣架喇！香港經濟情況令好多人都好難置業，所以唔係人人都能夠買車買樓。所以我哋更重視個人發展，而唔再按一式一樣社會『成功』標準。」
你對工作的態度又是以上哪一種？青年人成長於香港經濟發展篷勃的時期，兒時教育、課餘活動使他們得以接觸不同範疇，甚至培養到「國際視野」，更能從中認識自己的才能與興趣，發展自己的夢想。現時年輕人重視自己的福利、權利，例如他們討厭加班、關注工作是否有升遷空間等；相較長者年輕時，香港經濟條件較艱苦，工種選擇亦較少，所以大多長者以前一生可能只做過一、兩份工作，亦以穩定作為工作的基礎，確保有穩定收入養活家人，所以相較年輕人不重視是否從工作中實現自我。
