老一輩受自己長大的經歷和年代背景影響，可能會覺得孩子天生天養就可以，如果遇上要教導孩子的情況，體罰也不失為一種管教方法。但對於年輕人來說，競爭的方式隨時代變得不一樣，他們可能更專注於鼓勵小朋友學習不同事物，甚至替他們安排補習。
「細路仔跌跌下就大架喇，『天生天養』，我哋細個嗰時周圍玩，成日都跌親㗎啦，阿爸阿媽邊理得咁多！如果仲係唔乖，就打下手板！」
「而家唔打得小朋友㗎喇。唔可以體罰，亦唔好隨便鬧佢，小朋友唔乖咪慢慢教好佢。」
「你哋而家做父母嘅，太過溺愛啲小朋友喇，除咗唔鬧唔打，仲咩都為佢哋打點晒，又報活動，又報補習，小朋友好辛苦。」
「而家社會競爭咁犀利，幫小朋友報多啲活動、補習俾佢，等佢發掘多啲潛能。有句說話『贏在起跑線』，就係為小朋友準備好，而家努力咗，未來唔洗咁辛苦啊。」
「而家啲小朋友仲忙過啲大人！上次我見孫仔放咗學又要補習，扁晒嘴咁，俾咗包糖佢，點知你哋又話要收翻包糖，佢果下好唔開心……」
「緊係唔好俾糖佢啦！以後佢覺得只要唔開心，爺爺就會俾糖佢食，就真係縱壞晒！」
「上次孫仔睇住我哋兩代人鬧交，佢都忍唔住喊咗出嚟……」
「所以我哋真係要協調好點教小朋友，大家行一樣嘅規矩，如果唔係真係會破壞三方面關係，小朋友更加會無所適從……」
截然不同的教養孩子方法，不知道你較喜歡哪一種？教養方式會隨著社會風氣、經濟環境與個人價值觀而不同。但其實兩代人的分歧，都是源自對孩子的的期望及愛。然而，在爭執教養方式時，關係之中各人都會受到影響……
其實兩代的意見不同，亦很有機會影響孩子的教養。面對教養分歧，祖父母要認知到父母才是孩子的主要管教者，雖然有許多寶貴的養育孩子經驗，但有些技巧或已經不切合現今世代。祖父母可把心智發展層面，即如孩子的課業、社交、人格發展留待父母安排，祖父母較多負責照顧。兩代人都必須注意，切忌因教養方式不同，最終演化成爭奪孩子歡心的局面，而兩代人也應該避免因為細節、小事而互相指責，否則對整個家庭關係都無益。
這個時候，無論是老友記，還是年輕人，也許都忽略了一個重要的持份者──孩子。孩子年紀雖小，他們都有自己的喜惡、想法、感受，孩子也是一個獨立的個體，需要被家庭其他成員尊重與聆聽。不論是課業、活動以至興趣，孩子都有自己的取向，父母與祖父母不能完全把自己的希望放在孩子身上，而無視他們的感受。
