對老一輩來說，可能自己當年年紀輕輕已經要工作幫補家計，所以學歷「夠用就得」，應盡早出來工作，而且勤於工作，才能多勞多得。相反，由於時代變遷，為增加競爭力，年輕人多更重視提高學歷、自我增值，最好多精通幾個專業，才能更靈活面對各種機遇。
「以前社會好艱苦，食都冇得食，個個都要幫手養家。」
「計我話，而家中六畢業，都係基本乍。再讀多啲書、進修下，第時搵工都多啲選擇！」
「以前嘅工作大多係低技術或勞動力，多勞多得，唔洗太高學歷！就算係初中畢業，出嚟都有大把工作，行行出狀元，個個捱得都有出頭天！」
「而家唔同時勢，社會上有一種講法叫『學歷通脹』，即係愈來愈多人曾接受高學歷教育。而家社會普遍認為，有大學或以上學歷，讀專科做個專業人士，對搵工比較有幫助啊！」
「都係嘅，讀多啲書、識多啲嘢都好。以前我哋做嘅工作好多唔需要咩特別技術，好似工廠整玩具、車衫，唔洗讀太多書都可以搵錢養大你地幾兄弟姐妹。」
「而家好多工作都要『一人分飾幾角㗎』，好多『打工仔』都有唔同技能，可能又識設計，又識帶活動，又識電腦做文件工作。」
「以前放工就翻屋企，照顧屋企人，冇咩閒錢再去參加咩活動，街坊聚埋一齊喺屋邨傾下計、打下衞生麻雀已經係一種活動。」
「至於而家，除咗喺大專學院學習學術知識，年輕人都中意喺其他途徑自我增值，例如坊間興趣班、網上自學平台等，都有好多新事物。仲可以係Youtube頻道既社交媒體同人分享所見所學所想。」
雖然彼此成長背景、學歷不同，但現時長者與年青人一般都認為學業是重要的，尤其是對日後的事業發展。但隨著「學歷通脹」，大學學位再不像以前般罕有，甚至被稱為社會的「入場券」，還需不同技巧（例如：社交、合作）才可以在社會立足。現時，香港已經由昔日的「工業型社會」轉型成「知識型經濟」，不再是工業的「多勞多得」的模式，而是更重視創新、知識、科學等。長輩鼓勵年輕一輩努力學習之餘，更重要的是了解他們獨特的個人興趣、目標，讓他們在自己感興趣的範圍發展，成就其可能性。
