成長於不同時代，每個人都受不同的社會、文化、經濟、教育等的背景影響，我們難不免與其他年代的人有意見不一的地方，因此造成有許多世代間的「熱話」。這些「熱話」好比燙手山芋，一談不來，激烈爭執隨時「一觸即發」！不過，且慢，開口前，你又想過另一代人是怎樣想嗎？我們結集一些常見的「熱話」，讓你「知己知彼」，讓你邊看邊想想，我們的想法有甚麼差異，又有甚麼方法縮小我們的差異？
在家庭關係方面，老一輩可能會有更強烈要成家立室的觀念，並且視養妻活兒為必然的責任。相反，年輕人可能會覺得婚姻不再不可或缺，若要組織家庭，就必須確保關係的質素，不能只是確保孩子的物質需要，把他們養大就算。
「結婚生仔係人生必經階段！」
「而家年輕人覺得唔一定要結婚，亦唔一定要生仔！」
「所謂『男大當婚，女大當嫁』，到一定年紀，就當然要結婚！結婚後就更要承擔『傳宗接代』嘅『任務』，生兒育女！」
「我就唔認同啦。結婚同生兒育女並非必然之事，最重要係知道自己需要啲咩，因此婚姻、建立家庭唔係人生必經之路。而且愛情價值觀人人都唔同，婚姻唔應該作為談戀愛嘅目標。」
「我哋老一輩覺得有家庭嘅話，人生會完滿啲。喺家庭入面，爸爸要努力賺錢養妻活兒、『供書教學』，努力搵錢，有時難免要犧牲少少同屋企人相處時間；至於媽媽就要好好照顧小朋友！」
「我就覺得即使結婚、生小朋友，最重要都係享受天倫之樂、夫婦同親子關係嘅質素，而盡量唔好只為賺錢，但犧牲陪伴仔女成長嘅時光；而且現代家庭爸爸、媽媽唔一定分工咁明顯，爸爸一樣可以做『家庭主夫』，媽媽一樣可以出去工作。」
「傳統家庭觀念就係『男主外，女主內』，而且重視道德倫理規範，後輩對長輩要表現服從同尊重，咁樣家庭先會穩定。」
「計我話只要家庭協調好，負起自己喺家庭嘅責任，家庭生活一樣可以好美滿。不過最終，結婚、生仔與否都係個人同伴侶決定，即使單身又有咩問題吖。」
你又同意老薑還是薑仔的想法？其實結婚、育兒與否，社會風氣、經濟環境與個人價值觀都會互相拉扯，影響我們的決定。但再聽聽另一代的心聲，你聽出他們對家庭、婚姻背後的信念嗎？
