環保署去年10 月開始喺5 條公共屋邨共約30幢樓試用智能回收桶收集廚餘，頭6 個月已有超過四成居民使用回收桶，累計收集逾400 公噸廚餘。呢個計劃今年3 月進入第二階段，擴展到天水圍天恒邨、馬鞍山利安邨及慈雲山慈康邨。環保署話目標喺2023/24年度擴展到全港約百幢公屋。
收集廚餘嘅智能回收桶係非接觸式設計，仲可以自動除臭，唔會影響屋邨環境，收集到嘅廚餘會運去環保署小蠔灣有機資源回收中心，用嚟產生能源同堆肥，實現轉廢為能。市民只需掃描「綠綠賞」會員二維碼，就可將廚餘放入回收桶，桶內置有重量同容量感應器，當放入桶嘅廚餘重過100 克，頂蓋會喺20 秒後自動蓋上以防止廚餘滿溢，仲會發送提醒信息，提醒管理和清潔團隊更換內桶。
為進一步推動市民參與，環保署引入獎賞制度，市民可藉回收廚餘積累「綠綠賞」積分，喺指定公屋禮品兌換機或者「綠在區區」任何回收點兌換日用品或食品，例如麵食、米、芥花籽油等。
