「屋企後山」，顧名思義就喺15 分鐘內到達密集住宅區嘅綠化帶。保育團體Parks and Trails及WYNG基金會噚日發表報告，發現10 條後山小徑平均每日大約有400 至500 人行，周末更加有700 至800 人。Parks and Trails 伙伴協作及傳訊總監鄺芯妍話，後山使用率高，對行山客身心都有益，絕對唔係閒置剩餘空間，社會價值不容忽視。
團體：使用率高 非閒置空間
研究小組喺上年7至8月，同埋上年12月至今年2 月，喺10 條山徑入口附近安裝感應器，每個地點放置6 至12 日，點算人次同記錄人流方向，發現後山小徑主要使用者係當區街坊；當中人流最旺嘅係粉嶺蝴蝶山，平日超過1200 人到訪，周末更超過1500人，相信因為嗰度係行山熱門路線。
10 條山徑包括將軍澳鴨仔山、蓮苑徑及寶坑徑；彩虹斧山；牛頭角沈雲山及平山；粉嶺蝴蝶山；深水埗窩仔山（主教山）及嘉頓山；荃灣芙蓉山；沙田道風山；屯門屯門徑；由銅鑼灣到筲箕灣嘅金督馳馬徑及柏架山下引水道；同埋堅尼地城摩星嶺。
WYNG 基金會高級項目經理黎文燕話，欠缺保養嘅山徑比較難去，建議政府用可持續發展方式謹慎改建。
