漢服蘊含深厚歷史文化，黛安聽聞，黃大仙中心即日起至8月27日，推出「我和漢服有個約會」主題活動，仲同「中國妝束復原團隊」及「國風雅集香港漢服文化協會」合作，展出3套極具歷史價值嘅漢服復原珍品，包括唐代敦煌供養人裝束、唐代仕女直領手繪花紋長裙、以及長沙馬王堆漢墓出土嘅漢代服裝曲裾袍服。
中心北館1樓及2樓更設「穿越古時空」打卡區，有小橋流水古船同中式古典庭院等，鍾意漢服嘅朋友，亦可到「漢服體驗館」免費租借漢服拍照，仿如穿越時空。周末仲有古風工作坊同古時遊戲，憑指定消費即可自製古典香囊或繪畫古扇；中心北館1樓更將喺本月18及19日，舉辦漢風主題市集，屆時喺商場消費即可以免費換領龍鬚糖等等。
另外，黃大仙中心又聯同「丹青承南漢服社」，神還原8位中國歷史知名人物嘅漢服造型，包括中國四大美人等，漢服社組員更會喺本月31日換上該8套漢服巡遊動漫節、黃大仙中心及嗇色園，千祈唔好錯過喇！
