今個月初嘅世紀大暴雨，導致全港多個地區水浸。議員楊永杰話近日接到竹園鄉村居民嘅求助，居民反映港鐵公司因為要興建黃大仙公共運輸總站建造工程，令暴雨期間洪水急湧至竹園鄉內，居民損失慘重。興建黃大仙公共運輸總站本身係一件惠民嘅好事，之不過因為呢個工程喺沙田坳道南迴旋處進行加擋土牆及整改工程，令到暴雨期間，雨水由山上向下流，到達沙田坳道同鳳德街交界開始後，被呢個擋土牆分隔。原本問題都唔大，但迴轉處引水道同排水渠工程未完工，導致無法發揮效用，最終導致洪水急湧至竹園鄉內。咁應該點處理呢？楊永杰話已經要求路政署同港鐵代表盡快完成工程，研究加深地下引水渠嘅深度同擴闊雨水收集口嘅寬度，以加強疏水功能，港鐵方都話要進行相關研究。楊永杰話雨季尚未結束，希望可以盡快聽到好消息啦！港鐵話工程係受政府委託，喺鳳德道以南沙田坳道南北行綫進行道路整改工程，包括行車道、行人路及相關雨水渠，而有關工程承建商喺路旁築高擋土牆同車道兩旁設置雨水渠收集雨水；村民投訴嘅擋土牆其實係可以防止行車道嘅雨水流入行人路；而行人路嘅設計向行車路傾斜，雨水可以由竹園鄉村流到低處嘅擋土牆並沿邊向下而流。港鐵又強調香港近日錄得極高雨量，但係沙田坳道南北行綫、兩旁行人路都冇出現積水情況咁話。
